Leikskólinn keypti holukubba fyrir áramót og fengum við þá afhenda í vikunni. Holukubbar eru virkilega skemmtilegir og bjóða upp á ýmsan möguleika í hlutverkaleik og í byggingum. Holukubbarnir eru holir að innan og eru byggðir í sömu hlutföllum og einingakubbarnir. 

Við erum virkilega spennt fyrir þessum kubbum eins og sjá má á þessum myndum. 

Á Lækjarhvammi er verið að vinna með tröllaþema. Bækur um tröll eru lesnar og skoðaðar og börnin búa til tröll úr allskyns efniviði. Hér á myndinni sjáum við teikningar af tröllum frá 2017 árganginum.  

Í dag á Álftaborg afmæli en fyrir 53 árum eða árið 1966 opnaði leikskólinn. 
Í tilefni dagsins sungum við afmælissöngin fyrir leikskólann og fengum girnilega og safaríka ávexti í kaffitímanum; vínber, ananas, melónu og mandarínur. Í eftirrétt fengum við svo frostpinna, það var nú ekki leiðinlegt. 

Börnin á Seljalandi bjuggu einnig til afmæliskort fyrir leikskólann. 

Á meðal starfsmanna okkar eru tveir tímastarfsmenn sem voru í gömlu Álftaborg þegar þau voru lítil. Annar starfsmaðurinn, hún Sandra okkar, á enn Álftaborgarbol sem hún fékk þegar hún var í leikskólanum og kom í honum í dag. Þetta fannst börnunum virkilega áhugavert. :) 

Gleðilegt nýtt ár kæru foreldrar og börn!

Börnin á Merkisteini bjuggu til skemmtilegar gjafir fyrir foreldra sína til að gefa í jólagjöf. Við fylgdum sköpunar þemanu okkar í hvívetna og leyfðum börnunum alfarið að skapa það sem þeim langaði og úr þeim efnivið sem þeim fannst áhugaverður. 

Börnin voru spurð hvað þeim langaði að búa til fyrir mömmu og pabba og hvaða efnivið þau gætu notað til að búa það til. Yngstu börnin voru ekki með neina sérstaka hugmynd fyrir fram en völdu þann efnivið sem þau vildu nota. Flest eldri börnin fengu ákveðna hugmynd sem þau unnu svo úr. 

Með gjöfinni fengu foreldrar svo jólakort með QR kóða. Þegar kóðinn var skannaður opnaðist Sway vefsíða þar sem foreldrar gátu skoðað myndir af börnunum sínum. Bæði myndir af ferli gjafanna og aðrar myndir frá daglegu lífi í desember.